Multan se ek afsosnaak waqiya samne aya hai jahan ek aurat truck ki takkar se intiqaal kar gayi. Media reports ke mutabiq, accident ke baad us ka shohar apni marhooma biwi ki laash ko ambulance ya koi aur sahulat na milne ki wajah se motorcycle par bandhne par majboor ho gaya. Yeh manzar itna dil daikh aur dukh bhara tha ke wahan mojood log bhi aansoo rok na paye.
Is waqiya ki video kisi ne record karke social media par upload kar di jo ab tezi se viral ho rahi hai. Video mein dekha ja sakta hai ke shohar apni biwi ki laash ko motorbike ke sath bandh kar raste par le ja raha hai. Yeh manzar na sirf dil ko hila dene wala hai balke system par bhi sawal uthata hai ke aaj bhi gareeb aur mazloom logon ke liye basic sahulaton ki kami kyu hai.
Awam ke andar is video ke samne aane ke baad gussa aur afsos ki lehr daikhne ko mili hai. Social media users keh rahe hain ke gareeb insaan ke liye zindagi mein bhi aasaniyan nahi aur maut ke baad bhi izzat ke sath janaza le jana mushkil hai.
Hakoomati idaron se demand ki ja rahi hai ke aise waqiyaat ki roktham ke liye ambulance service aur health facilities har ilaqay mein faraham ki jayein taake kisi aur ko aise manzar ka samna na karna paray.